உள்ளடக்கத்தை உள்ளூர்மயமாக்குவதன் மூலம் எவ்வாறு புதிய பார்வையாளர்களைச் சென்றடையலாம்?

உள்ளடக்கத்தை மொழிபெயர்க்கப்பட்ட, கலாச்சார ரீதியாகத் தொடர்புடைய பதிப்புகளாக உள்ளூர்மயமாக்குவதால் உள்ளடக்கக் கிரியேட்டர்கள் அவர்களின் பார்வையாளர் எண்ணிக்கையை அதிகப்படுத்தி எவ்வாறு கூடுதல் சந்தைகளைச் சென்றடைகிறார்கள் என்பதை அறிந்துகொள்ளுங்கள்.

உள்ளடக்கக் கிரியேட்டர் என்ற முறையில், உங்கள் உள்ளடக்கத்தை முடிந்தவரை அதிகமான பார்வையாளர்களுக்குத் தொடர்புடையதாகவும் அவர்களை ஈர்க்கும் வகையிலும் வைப்பதே வருமானம் ஈட்டுவதற்கான முக்கிய அம்சம் என்பதை அறிவீர்கள். இதற்கான பயனுள்ள வழிகளுள் ஒன்று, உங்கள் வலைப்பதிவை மற்ற சந்தைகளுக்கோ மொழிகளுக்கோ ஏற்றவாறு உள்ளூர்மயமாக்குவதே ஆகும். இதன் மூலம் ஒரே உள்ளடக்கத்தை மீண்டும் பயன்படுத்தி கூடுதல் டிராஃபிக்கை ஈர்க்க முடியும். உள்ளூர்மயமாக்குதல் செயல்பாட்டில் என்னென்ன அடங்கியுள்ளன, அது உங்களுக்கு எவ்வாறெல்லாம் உதவும் என்பது குறித்தும் உங்கள் உள்ளடக்கத்திற்கு எந்தெந்தச் சந்தைகளும் பார்வையாளர்களும் பொருத்தமாக இருப்பார்கள் என்பது குறித்தும் இந்தக் கட்டுரையில் விவரித்துள்ளோம்.

உள்ளூர்மயமாக்குதல் என்றால் என்ன? அது ஏன் முக்கியத்துவம் வாய்ந்ததாக உள்ளது?

உள்ளூர்மயமாக்குதல் என்பது உங்கள் வலைப்பதிவையோ பிற உள்ளடக்கத்தையோ புதிய பார்வையாளர்களுக்காக அவர்களின் கலாச்சாரத்திற்கு ஏற்ற வகையில் மொழிபெயர்ப்பதாகும். வழக்கமான மொழிபெயர்ப்பைப் போன்று இல்லாமல், இதில் பேச்சுவழக்குகளோ பிற உள்ளூர் சொற்றொடர்களோ பயன்படுத்தப்படும். மேலும் இலக்கு மொழியின் தன்மைக்கேற்ப அர்த்தத்துடன் உள்ளடக்கமானது மொழிபெயர்க்கப்படும். உள்ளூர்மயமாக்குதல் மிகவும் முக்கியமானதாகும். ஏனெனில் மிகவும் பிரபலமான ஆன்லைன் மொழியாக ஆங்கிலம் இருந்தாலும்கூட நான்கில் ஒரு பங்கு பயனர்கள் மட்டுமே அதைப் பயன்படுத்துகின்றனர். அதாவது உங்கள் உள்ளடக்கத்தை ஆங்கிலத்தில் மட்டுமே வெளியிட்டால் உலகம் முழுவதுமுள்ள ஆன்லைன் பயனர்களில் 75% மக்களை அது சென்றடையாது.

உள்ளூர்மயமாக்குதலைத் தொடங்கும் முறை

உள்ளூர்மயமாக்கத் தொடங்கும் முன்பு உங்களின் தற்போதைய உள்ளடக்கம் உலகின் எந்தெந்தப் பகுதிகளில் அறியப்பட்டுள்ளது என்பதையும் அந்தச் சந்தைகள் எந்தெந்த மொழிகளைப் பயன்படுத்துகின்றன என்பதையும் கண்டறியுங்கள். அவர்களுடைய உலாவியில் பயன்படுத்தும் மொழியின் அடிப்படையில் பயனர்களைத் தேடுவதன் மூலம் Google Analyticsஸில் இதை எளிதாகச் செய்யலாம்.

இலக்கிற்கான புதிய நாடுகளைக் கண்டறிந்த பிறகும் எந்தெந்த நாடுகளின் மொழிகளில் உள்ளூர்மயமாக்கப் போகிறீர்கள் என்பதைத் தேர்வுசெய்ய வேண்டும். உதாரணமாக, 87% மக்கள் ஆங்கிலம் பேசும் ஹாலந்து நாட்டில் இதைச் செய்ய வேண்டிய அவசியமில்லை. ஆனால் போலந்து நாட்டில் உள்ள 95% மக்கள் ஆன்லைன் உள்ளடக்கம் அவர்களின் சொந்த மொழியில் இருப்பதையே விரும்புகிறார்கள்.

உள்ளூர்மயமாக்குதல் செயல்முறையை முடிந்தவரை இலகுவாக்க, இந்தக் கட்டுரையில் உள்ள முக்கிய உதவிக்குறிப்புகளைப் பயன்படுத்துங்கள்.

தானியங்கு மொழிபெயர்ப்புக் கருவிகளை உபயோகிக்காதீர்கள்

ஆன்லைனில் கிடைக்கும் மொழிபெயர்ப்புக் கருவிகள் தினசரி உபயோகங்களுக்கு ஓரளவு உதவிடும். ஆனால் அவற்றின் மூலம் கிடைக்கும் மொழிபெயர்ப்புகள் முற்றிலும் சரியானவை என்று கூறிவிட முடியாது. பயனர்களுக்கு உங்கள் உள்ளடக்கம் சற்று குழப்பத்தை ஏற்படுத்துவதாகவோ இன்னும் சொல்லப்போனால் பொருத்தமற்றதாகவோ மாறிவிடக்கூடும்.

உள்ளூர் மொழிபெயர்ப்பாளரின் உதவியை நாடுங்கள்

உள்ளூர்மயமாக்குதலுக்கு ஒரு தகுதிவாய்ந்த உள்ளூர் மொழிபெயர்ப்பாளரை நியமித்தால் உங்கள் உள்ளடக்கத்திற்கான மொழிபெயர்ப்புகள் துல்லியமானவையாக இருக்கும். அத்துடன் அந்த நாட்டின் கலாச்சாரத்திற்கு ஏற்றதாகவும் உங்கள் பயனர்கள் ஆர்வமுடன் படிக்கும் வகையிலும் இருக்கும்.

உலகளாவிய மொழித் தேர்வியை (Universal Language Selector - ULS) பயன்படுத்துங்கள்

உங்கள் வலைப்பதிவில் உலாவும்போது காட்டப்பட வேண்டிய மொழியைப் பயனர்கள் அமைப்பதற்கான எளிய மற்றும் இணக்கமான வழியை இந்த அம்சம் வழங்குகிறது. இதன் மூலம் பயனர்கள் தங்களின் சாதனத்தில் இல்லாத எழுத்து வடிவங்களைக் கொண்ட உள்ளடக்கத்தைப் படிக்க முடியும். மேலும் உங்கள் இணையதளத்தின் மெனுவில் பயன்படுத்தப்படும் மொழியைப் பிரத்தியேகமாக்கிக் கொள்ளவும் முடியும்.

சர்வதேச SEOவிற்கான சிறந்த நடைமுறைகளைப் பின்பற்றுங்கள்

உங்கள் வலைதளம் விரைவில் வெவ்வேறு மொழிகளுக்கும் இருப்பிடங்களுக்குமான உள்ளடக்கத்தைக் காட்டும் என்பதால் SEOவிற்கான இந்தச் சிறந்த நடைமுறைகளைப் பின்பற்றுவதை உறுதிசெய்து கொள்ளுங்கள். உதாரணமாக, உங்கள் வலைதளத்தின் எந்தப் பதிப்பில் விளம்பரங்களைக் காட்ட வேண்டும் என்பதை Google அறிந்திருப்பதை உறுதிசெய்ய, hreflang குறிச்சொற்களைப் பயன்படுத்த வேண்டும்.

அனைத்து உள்ளடக்கத்தையும் ஒரே நேரத்தில் மொழிபெயர்க்காதீர்கள்

உங்கள் உள்ளடக்கம் அனைத்தையும் ஒரே நேரத்தில் எல்லாச் சந்தைகளுக்கும் உள்ளூர்மயமாக்கிவிட வேண்டும் என்று அவசரப்பட வேண்டாம். அதற்குப் பதிலாக, உள்ளடக்கத்தைப் படிக்கும் பெரும்பான்மையான பார்வையாளர்கள் எந்த மொழியைப் பேசுகிறார்கள் என்பதை அறிந்துகொண்டு பிரபலமான உள்ளடக்கத்திற்கு முன்னுரிமை அளித்து அதை உள்ளூர்மயமாக்கத் தொடங்குங்கள். பயனர்கள் பயன்படுத்தும் மொழியில் AdSense தானாகவே விளம்பரங்களை வழங்குவதால் ஒவ்வொரு மொழிக்கும் விளம்பரங்களை அமைப்பது தொடர்பான உங்கள் பணிச்சுமை குறையும்.

அடுத்த படிகள்

ஒரே உள்ளடக்கத்தைப் பயன்படுத்தி அதிகமான பார்வையாளர்களிடம் அதைச் சேர்ப்பதற்கு உள்ளூர்மயமாக்குதல் சிறந்த வழியாகும். ஒப்பீட்டளவில் இதற்கு குறைந்த முயற்சியும் நேரமுமே ஆகும். கவனத்திற்கு: சிறந்த நடைமுறைகளுக்கான வழிகாட்டுதல்களைப் பின்பற்றாமல் இருப்பதும் குறைவான தரம் கொண்ட உள்ளடக்கத்தை உருவாக்குவதும் உங்கள் பிராண்டு பெயரை விரைவில் சேதப்படுத்திவிடலாம். அத்துடன் ஏற்கெனவே உள்ள வாடிக்கையாளர்கள் அடுத்த முறை உங்கள் வலைதளத்திற்கு வராமலும் போகலாம்.

உள்ளூர்மயமாக்குதலுக்கான பரிசோதனையைச் செய்யவும் அதை நடைமுறைப்படுத்தவும், ஆலோசனைகள் உங்களுக்குத் தேவை என்றாலோ புதிய பிராந்தியங்களுக்கு உங்கள் உள்ளடக்கத்தை விரிவுபடுத்துவது தொடர்பான உதவிக்குறிப்புகளைப் பார்க்கவோ சந்தைகளைக் கண்டறிவதற்கான இணையதளத்திற்குச் செல்லுங்கள். உள்ளூர்மயமாக்குதலைத் தொடங்குவதற்குத் தேவையான அனைத்து வழிகாட்டிகளும் உதவித் தகவல்களும் அங்குள்ளன. உங்களின் புதிய திட்டம் தடையின்றித் தொடர அவை உதவும்.