Pinakamahuhusay na kagawian para sa Google AdSense

Ano ang pinakamahuhusay na kagawian para sa Google AdSense? Tingnan ang aming mga rekomendasyon para tulungan kang kumita gamit ang AdSense

Para kumita sa Google AdSense, mahalagang sundin mo ang pinakamahuhusay na kagawiang ito sa Google AdSense. Hindi lang nito titiyaking patuloy mong madaragdagan ang iyong kita sa Google AdSense, pero makakatulong din ito sa iyong tiyaking patuloy na lalago at magtatagumpay ang site mo.

1. Mag-eksperimento sa iba't ibang unit ng ad.

May dahilan kung bakit nagbibigay ng iba't ibang istilo ng ad ang Google AdSense. Mahihimok at magki-click sa iba't ibang uri ng mga ad ang iba't ibang bisita sa iyong site. Magki-click ang ilan sa mga link. Ang ilan naman ay magki-click sa malalaking banner. Ang ilan pa ay magki-click sa mga video block.

At hindi ito dahil sa istilo ng ad, dahil ito sa advertiser na gumagamit sa partikular na istilong iyon at sa bisitang maipapares sa advertiser na iyon. Halimbawa, sabihin nating may isang taong pumunta sa iyong site na kakagaling lang sa site ng isang malaking retailer. Kung may mga remarketing ad na may partikular na laki ang retailer na iyon, at gumagamit ka ng katugmang ad block, lalaki ang pagkakataon mong makakuha ng pag-click sa iyong ad.

Kaya dapat ka ngang mag-eksperimento sa iba't ibang unit ng ad. Baka malaman mong ang iyong mga leaderboard, skyscraper, at link na unit ng ad ang may pinakamahusay na performance.

2. Hanapin ang pinakamagagandang placement ng ad para sa uri ng iyong site.

Kung hindi ka sigurado kung saan mo dapat ilagay ang iyong mga Google AdSense ad, puwede kang magsimula sa mga resource na ito para sa pinakamagagandang placement ng ad para sa mga site ng balita, site ng classifieds, site tungkol sa gaming, forum, blog, site tungkol sa sports, at site tungkol sa paglalakbay.

Isa pang paraan para malaman kung ano ang magiging pinakamainam sa iyong audience ay ang hanapin ang lahat ng pinakasikat na site na katulad ng site mo at tingnan kung ano ang ginagawa nila. Kahit na hindi sila gumagamit ng Google AdSense, tingnan nang mabuti kung saan nila inilalagay ang kanilang mga advertisement. Malaki ang posibilidad na napag-aralan na nila kung anong mga placement ang makakatanggap ng pinakamaraming impression o pag-click para sa kanilang mga advertiser.

Kapag nakapagsaliksik ka na, puwede mo na itong subukan. Subukan ang mga rekomendasyon ng Google nang isang linggo, pagkatapos ay subukang ilagay ang iyong Google AdSense tulad ng paglalagay ng ibang sikat na site ng mga ad nila nang isang linggo. Tingnan kung aling linggo ang may pinakamahusay na performance pagdating sa kita, at malalaman mo kung aling layout ang pinakamainam para sa iyong audience.

3. Pagpasyahan kung kailangan bang maging responsive ang iyong mga ad.

Una sa lahat, kailangang maging responsive ang disenyo ng iyong site, dahil iyon ang inirerekomendang paraan ng Google para maging pang-mobile. Pero ang mas mahalagang tanong, kailangan bang maging responsive ang iyong mga ad? Una sa lahat, gugustuhin mong tingnan ang iyong site sa smartphone mo para makita ang hitsura ng iyong mga ad. Kung may mga leaderboard kang lumalampas sa iyong header, baka gusto mong pag-isipang gawin na lang responsive na leaderboard na unit ng ad ang static na leaderboard.

Pero bago mo iyon gawin, baka gusto mo munang makita kung mahalaga ang trapiko sa mobile sa iyong site at pati na rin sa kita mo mula sa AdSense. Magagawa mo ito sa pamamagitan ng pagpunta sa iyong Google Analytics. Sa partikular, gugustuhin mong i-link ang iyong Google Analytics account at AdSense account sa isa't isa para matuto ka pa tungkol sa iyong mga user sa desktop kumpara sa mga user mo sa mobile at kung gaano kadalas sila nagki-click sa iyong mga ad.

Posibleng matuklasan mong kung io-optimize mo ang iyong mga ad para maging pang-mobile ang mga ito, lalaki ang kita mo sa AdSense sa kabuuan, hindi lang sa mga user sa desktop.

4. Patuloy na gumawa ng bagong content.

Umaasa sa bagong content ang karamihan ng mga uri ng mga site para makahimok ng mga bagong bisita at mahikayat na bumalik ang mga dating bisita. Kadalasan, ang bagong content ay mga bagong post sa blog, bagong talakayan, o bagong content na binuo ng user. Anumang uri ng content ang ginagawa mo, tiyaking madalas kang gagawa nito para patuloy kang makahimok ng mga bisita sa iyong site.

Para matiyak na patuloy na magdadala ng trapiko sa iyong site ang bago mong content, sundin ang Mga Alituntunin ng Webmaster ng Google para i-optimize ito para sa mga search engine para sa isang partikular na keyword na parirala na sinaliksik mo gamit ang Keyword Planner ng Google AdWords. Kung mas marami kang gagawing naka-optimize na content, mas marami kang trapikong matatanggap mula sa mga user ng search engine sa kalaunan.

Bukod pa sa paggawa ng bagong content, bigyang-daan ang mga bisita na makabalik sa iyong site. Hikayatin silang mag-subscribe sa iyong site sa pamamagitan ng email o iba pang nangungunang social media network para ma-promote mo sa kanila ang iyong pinakabagong content. Ang layunin ay magkaroon ng mga channel kung saan mo makakaugnayan ang iyong mga tagahanga para mapabalik mo sila sa iyong site nang sa gayon ay mapa-click sana sila sa mas marami sa mga ad mo.

5. Patuloy na i-promote ang iyong content at ang site mo.

Kung gusto mong magpanatili ng magandang kita mula sa Google AdSense, palagi mo dapat patuloy na i-promote ang iyong content at ang site mo. Palagi. Muli, sundin ang Mga Alituntunin ng Webmaster ng Google at tiyaking hindi ka lumalabag sa mga patakaran ng Google AdSense kapag pino-promote mo ang iyong site.

Dahil doon, palagi ka dapat maghanap ng mga pagkakataong i-promote ang iyong content at ang site mo sa mga natural na paraan. Kung aktibong-aktibo ka sa social media, may mga link dapat papunta sa iyong site sa mga profile mo sa social media. Habang nakikipag-ugnayan ka sa iba at bumubuo ka ng magagandang relasyon, malamang na kumonekta sa iyo ang mga tao at gugustuhin nilang malaman ang higit pa tungkol sa iyo sa pamamagitan ng pag-click papunta sa site mo.

Puwede ka ring sumali sa mga grupo at forum sa social media na tumutugma sa paksa ng iyong site at makipag-ugnayan sa mga miyembro ng mga grupo at forum na iyon. Malamang na magkakaroon ng mga pagkakataon kung saan magagamit ang iyong site bilang may kaugnayang resource na sagot sa isang tanong, o titingnan lang ng mga taong kausap mo ang iyong profile para malaman ang higit pa tungkol sa iyo at magki-click sila papunta sa site mo.

Tiyakin din sa partikular na makipag-network sa mga blogger na nagsusulat tungkol sa paksa ng iyong site. May posibilidad na kung magkakaroon ka ng magandang relasyon sa kanila sa pamamagitan ng mga komento sa blog at social networking, baka banggitin nila ang iyong site sa mga post nila sa blog.